बारावी परीक्षेत कॉपी तपासणी प्रकरणी महिला कर्मचाऱ्यांची पॉस्को आणि विनयभंगाच्या गुन्ह्यातून मुक्तता

पुणे : लोणी काळभोर येथील एका नामांकित महाविद्यालयातील महिला शिपायांची पॉस्को आणि विनयभंगाच्या गुन्ह्यातून मुक्तता करण्यात आली .

परीक्षा केंद्रावर सर्व शिक्षक व शिक्षकेतर कर्मचाऱ्यांना अश्या परिस्थितीला सामोरे जावे लागते त्यामुळे ॲड. सचिन – पाटील झालटे यांचा युक्तिवाद व कोर्टाने दिलेला निर्णय परीक्षांशी संबंधित असणाऱ्या सर्व कर्मचाऱ्यांचे मनोधर्य वाढवणारा मानावा लागेल.

विशेष न्यायालयातील जहागीरदार कोर्टाने हा निकाल दिला . बारावीची परीक्षा कॉपीमुक्त चालावी म्हणून बारावी बोर्डाने संबंधित महाविद्यालयाला चालविण्यास परीक्षा केंद्र सांगितले होते . त्याप्रमाणे २१ फेब्रुवारी २०१८ रोजी इंग्रजी विषयाच्या पेपर दरम्यान कॉपीवर आळा घालण्यासाठी विद्यालयातील दोन महिला शिपाई यांना परीक्षा केंद्रावर सहाय्यक म्हणून नियुक्त केले होते . या महिला शिपाई कर्मचारी परीक्षा हॉलच्या बाहेर येणाऱ्या विद्यार्थिनींना अंगझडती करत आतमध्ये सोडत होत्या . त्या दरम्यान एका विद्यार्थिनीस महिलांनी कॉपीच्या संशयावरून बंदिस्त रूममध्ये नेऊन तिच्या टॉप तसेच तिचे कपडे काढायला लावून अंगझडती घेतली होती .

त्यामुळे पीडित मुलीस मनाला लज्जा उत्पन्न झाल्याने तिने लोणी काळभोर पोलीस स्टेशन येथे वरील महिला शिपाई यांच्याविरोधात विनयभंगाचा गुन्हा १४ जून २०१८ रोजी दाखल केला होता . इतर मुलींनाही अशाच पद्धतीने तपास केल्याचे तपासी अधिकाऱ्यांना तपासात निष्पन्न झाले होते .

ॲड. झालटे यांचा युक्तिवाद

मुलींची झडती तपासणी कक्षातच केलेली
■ आरोपींनी सचिन झालटे – पाटील यांच्यामार्फत दोष सिद्धीपूर्वीच मुक्तता करण्यासाठी विशेष न्यायालयातील जहागीरदार कोर्ट यांच्या न्यायालयात अर्ज केला होता . आरोपींचे कृत्य हे विनयभंग या सदरात मोडत नसून महिला आरोपींनी पीडित मुलींची तपासणी ही सार्वजनिक ठिकाणी न करता तपासणी कक्षात केलेली आहे .
■ तसेच आरोपींनी पीडित मुलींच्या तपासणी वेळी हात लावण्याची कृती ही कॉपी तपासण्यासाठी अनिवार्य होती . त्यामध्ये मुलींचा विनयभंग करण्याचा कोणताही उद्देश अथवा हेतू नव्हता , असा युक्तिवाद केला .
■ तसेच आरोपींच्या वकिलांनी विमानतळावर संशयितांची तपासणी करताना अशा पद्धतीने अंगावरील कपडे तपासणी कक्षात उतरविण्यास सांगतात , याचे उदाहरण दिले . तसेच आरोपींच्या वकिलांनी यासंदर्भातील एचएससी बोर्डाची निर्देशित तपासणी नियमावलीदेखील सादर केली होती .
हा युक्तिवाद मान्य करीत न्यायालयाने आरोपींची दोषातून मुक्तता केली .